मी तुझ्या पाठीशी आहे!

 “ओपेनहायमर”साठी किलियन मर्फीला या वर्षीचे सर्वोत्तम अभिनेत्याचे एमी आणि बाफ्टा अवॉर्ड मिळाले आहे आणि आता मार्च महिन्यात दिले जाणारे प्रतिष्ठित, सर्वोच्च मानाचे ऑस्कर अवॉर्डही बहुतेक मिळेलच.

विक्रांत मासीला या वर्षी “ट्वेल्थ फेल”साठी फिल्मफेअरचे सर्वोत्तम अभिनेत्याचे क्रिटिक्स अवॉर्ड मिळाले.

किलियन २००२पासून अभिनय करतोय. नोलानबरोबर तो २००५ पासून काम करतोय, नोलानच्या तीन सिनेमांमध्ये तो झळकलादेखील, पण दुय्यम भूमिकांमध्ये. त्याच वेळी त्याचा स्वतंत्र प्रवास सुरू होताच. ’पीकी ब्लाइंडर्स’ने मात्र तो लोकांच्या नजरेत भरला. जे रॉबर्ट ओपेनहायमर यांच्या व्यक्तीरेखेसाठी नोलानला तोच योग्य वाटला. आणि आज अत्यंत प्रतिष्ठेचे सन्मान त्याच्याकडे चालून येत आहेत. लोक त्याचं कौतुक करताना थकत नाहीयेत- त्याला हातचं राखून अभिनय त्याला येत नाही, तो पात्राच्या व्यक्तिमत्त्वात स्वत:ला झोकून देतो, कमी बोलतो, विचार अधिक करतो, प्रचंड मेहनत घेतो… वै वै. शिवाय त्याचे निळे, काहीसे पारदर्शक डोळे, उंच गालफडं आणि प्रसिद्धीपासून लांब राहणं त्याच्या गूढपणात भर घालतंय. 

 

विक्रांत मासीचीही कहाणी साधारण अशीच आहे. २००७ पासून तोही अथक काम करतोय, अनेक गाजलेल्या टिव्ही मालिकांमध्ये आणि चित्रपटांमध्ये तो होता. पण पब्लिकच्या नजरेत भरत नव्हता, इतकंच. झोया अख्तरने तिच्या ’दिल धडकने दो’च्या तगड्या स्टारकास्टमध्ये त्याला एक महत्त्वाची भूमिका दिली, ’छपाक’मध्ये दिपीकाचा तो प्रियकर होता, तर ’लूटेरा’मध्ये रणवीरचा मित्र. ’डेथ इन द गूंज’मध्ये तर तो मुख्य भूमिकेत होता. कोंकणा सेनने दिग्दर्शित केलेल्या या जबरदस्त इन्टेन्स सिनेमात त्याला मुख्य भूमिका मिळाली, हे त्याच्यावर झालेलं शिक्कामोर्तबच. पण “ट्वेल्थ फेल” हा सिनेमा, त्याचा अप्रतिम विषय, माहितीच्या कहाणीची प्रभावी मांडणी आणि विधू विनोद चोप्राचे दिग्दर्शन! विक्रांत मासी ’माहित’ होता, तो एकदम लोकप्रिय झाला. त्याचं मध्यमवर्गीय दिसणंही एकदम आवडायला लागलं, त्याचा साधा चेहऱ्यालाही स्टारडम आलं!

 

सांगायचा मुद्दा काय, की गुण प्रत्येकात असतात, कष्ट प्रत्येक जण घेत असतो. पण तेवढं पुरत नाही. पाठीशी द्रष्टा आणि खंबीर ’कर्ताकरविता’ आवश्यक असतोच. किलियनला नोलन मिळाला, विक्रांतला चोपडा आणि या हिऱ्यांना साजेसं कोंदण मिळालं.

असं नशीब प्रत्येकाचं नसतं. अनेक जण केवळ धडपडच करत राहतात, पण नशीबाची पुरेशी आणि योग्य वेळी साथ न मिळाल्यामुळे तसे दुर्लक्षित राहतात. एखाद्याची जेवढी क्षमता आहे, तेवढा तिचा पुरेपूर वापर करणाराही कोणीतरी हवा ना! म्हणूनच, ज्याचा तुमच्यावर विश्वास आहे, आणि स्वत:वर, स्वत:च्या निवडीवर जास्त विश्वास आहे, असा “मी तुझ्या पाठीशी आहे” म्हणणारा कोणीतरी प्रत्येक लायक व्यक्तीला मिळो, ही देवापाशी, अर्थात या जगाच्याच दिग्दर्शकाकडे प्रार्थना.  

*********